GINTONG SANDALI

Ako'y pinalad, binigyan ng Maykapal

Kayong kaibigan na sa'ki'y nagmamahal

Laging nariyan, handang dumamay

Laging nasa tabi, handang umagapay

Kayo ang sa'ki'y nagpamulat ng mata

Kagandahan ng mundo ay makita

Kayo ang sa aki'y nagpasaya

Sa buhay ko'y nagbigay sigla

'Yan kayo na sa aki'y naging gabay

Sa mga problema sa aki'y nagpatibay

Sana walang bumitaw sa'ting paglalakbay

Sama-samang aabutin, bukas na naghihintay

Sa ating mga gintong sandali

Sa problema, sa saya kahit pighati,

tawanan, asaran, maging hikbi

Lahat sama-sama, walang hindi sumali

Kayo lang ang laging kasama

Kapag nagkayayaan, lahat uubra

Patak-patak kung kailangan pa

Basta lahat masaya, walang kokontra

Magkalayo-layo man balang araw

Walang gagawin kundi ang magbalik-tanaw

Na sana maibalik at magawa muli

Lahat ng oras nating mga gintong sandali.